Fründe

Mit dene Lüt verbring ich dehei im Fricktal de gröschti Teil vo minere Freiziit. Ferie, Bike, Usgang oder eifach gmüetlich hängä. Eigentlich send mer alli total verschedä, vorallem was Bruef agoht, aber irgend öppis händ mer wohl doch gmeinsam. Wie vell mer mini Fründe bedüüte, hani gmerkt woni fort gange be zum i de USA go studiere. Drum esch au die Siite entstande. Fotene hani leider noni vell. Wenn du mer no es guets schicksch vo öppererem uf dere Siite tue nis gern dezue.

Das bin ich, min beschte Fründ. Meh über ich finsch uf de Siite über mich.

Als angehende Psychotherapeut het de Hugo vell Ziit zum bike. Immer steiler, wiiter, höcher. Nome d'Jäger und Förschter händ ned so Freud anem.

Eusi diplomierti Chankeschwöschter. Sie het Stil und Charakter. Dur ihri offni und direkti Art cha me mit ihre über alles rede. De Claudi cha me nüt vormache, sie durchschaut eim immer.

De Bike-Killer. De Luke schafft jede Rahme. Am liebschte die us Plaschtig (Carbon). Inzwösche esch er aber uf stabilers Material umgstiege und macht sich grad am North-Shore in Kanada en Name als Extrem-Biker.

De Musiker. Professionelle Jazz-Gitarischt und Bandleader vo mercedesfunk und Soundic. Uf sinere private Homepage www.rguitar.ch chasch sini Musig abelade.

De High-Tech Mechaniker und Zeichner. De Kaisi schaffts, es kompletts Sofa in es Couvert z'verpacke und über de Atlantik z'schicke.

Eusi Künschtlerin. Sie macht super Fotene und gstallterischi Arbete. Sit neuschtem au mit em Computer.

Achtung! D'Stefanie S. liedet under dem höchscht asteckende SS-Syndrom. D'Symptom variere vo churze Kicherusbrüch bis zu unkontrollierbare Lachafäll. Wer sich au immer für längeri Ziit in ihrere Umgebig ufhaltet, werd devo befalle. Abgseh vo dem esch d'Stef aber ganz en Liebi.

Sie kennt sich us mit allne Arte vo Strahle. D'Carmen schaffts sogar, es leers Zündholzschächteli zum strahle z'bringe. Im Moment profitiert vorallem s'Graubünde vo Ihrem Strahle.

D'Anki esch meischtens guet ufgleit und weiss immer öppis z'verzelle. Und sie het öppis magisch-verzaubernds an sich. Uf jede Fall het sie scho fascht allne Männer uf dere Siite emol de Chopf verdreit. Sie weckt s'Läbe in eus und het scho so einige zum Nohdänke verholfe.

Wahrschienlich de stärkschti Automech im Fricktal. Im Moment trifft me ihn aber meh im Baselbiet ah. De Reto esch vielsiitig interessiert und het en ganz spezielli Art vo Humor.

Noch öppe zwoi Johr in Neuseeland und Australie fühlt sie sich dört unde so guet dehei wie do. D'Isa esch unkompliziert und natürlich und sie weiss, wie me richtig mit Ross umgoht.

Ziitigsmönsch bi be BaZ und Outdoor-Adventurer. Bim bike definiert de Kyburz d'Grenze vo Matrial und sich selber immer weder neu. Usserdem esch er Bassischt bi mercedesfunk und Soundic.

Früehner emol d'Chindergärtnerin vo Zeinige. Jetzt betreut Sie Chinder i de Chrippe und suecht noch ere neue Useforderig.

De Paul geseht me in letschter Ziit immer seltener. Meischtens esch er irgendwo uf dere Welt am Windsurfe oder am Geld verdiene zum weder go surfe.